MUNOSABAT

Xorijda yashab, mehnat qilayotgan va ta’lim olayotgan vatandoshlarimiz huquq va manfaatlarini ishonchli himoya qilish masalasi bugungi kunda davlat siyosatining eng ustuvor yo‘nalishlaridan biri sifatida belgilangan bo‘lib, bu barchamiz uchun g‘oyat muhim ahamiyat kasb etadi.

O‘zbekiston Respublikasi Prezidenti Shavkat Mirziyoyev raisligida 2026-yil 15-yanvar kuni o‘tkazilgan videoselektor yig‘ilishida xorijdagi diplomatik vakolatxonalar faoliyatini tubdan takomillashtirish, shuningdek, vatandoshlarimizning huquq va manfaatlarini amalda himoya qilish bo‘yicha aniq va qat’iy vazifalar belgilab berildi. Mazkur yig‘ilish tashqi siyosatda inson manfaatlari, fuqarolarimiz xavfsizligi va huquqlarini ta’minlash ustuvor ekanining yaqqol amaliy ifodasi bo‘ldi.

Yig‘ilishda elchilar va konsullar faoliyatiga yangicha yondashuv joriy etilib, “kabinet diplomatiyasi”dan voz kechib, xorijda mehnat qilayotgan vatandoshlarimiz, jumladan, mehnat migrantlari va talabalar bilan bevosita ishlash, ularning yashash va o‘qish joylariga borib, muammolarini o‘rganish, huquqbuzarliklarning oldini olish hamda malakali yuridik yordam ko‘rsatish zarurligi alohida ta’kidlandi. Bu borada diplomatik vakolatxonalar faqat rasmiy murojaatlar bilan cheklanib qolmasdan, amaliy yordam ko‘rsatishi lozimligi qayd etildi.

Shuningdek, mehnat migratsiyasi oqimi ortib borayotgan davlatlarda konsullarning asosiy vazifasi sifatida mehnat migrantlari bilan tizimli ishlash, fuqarolarni qonuniy ish o‘rinlariga yo‘naltirish, noqonuniy bandlik holatlarining oldini olish hamda yuqori daromadli mamlakatlar bilan qonuniy mehnat migratsiyasi bo‘yicha hamkorlikni kuchaytirish belgilab berildi.

Elchilar faoliyatini baholashda eksport tushumlari, turistlar oqimi va qonuniy mehnat migratsiyasi kabi ko‘rsatkichlarni KPI sifatida joriy etish tashabbusi mamlakatimiz iqtisodiy taraqqiyotiga xizmat qiladigan samarali yondashuv ekanini ko‘rsatadi.

Shu munosabat bilan, biz — ta’lim muassasalari, jamoat tashkilotlari va keng jamoatchilik vakillari sifatida, Prezidentimiz tomonidan belgilangan ushbu ustuvor vazifalarni to‘liq qo‘llab-quvvatlashimiz, xorijda tahsil olayotgan yoshlarimiz va mehnat migrantlarimiz bilan ishlashni yanada kuchaytirishimiz zarur, deb hisoblayman. Inson huquqlari va vatandoshlar manfaatlarini himoya qilish — Yangi O‘zbekiston taraqqiyotining eng mustahkam poydevorlaridan biridir.

Olim Murtazayev
Toshkent davlat iqtisodiyot universiteti
Samarqand filiali direktori, professor