Toshkent davlat iqtisodiyot universiteti Samarqand filialida Registrator ofisini tashkil etish uchun belgilangan xona nizomda ko‘rsatilgan darajada to‘liq ravishda kerakli inventarlar bilan ta’minlangan.

Endilikda oliy ta’lim muassasalarida Registrator ofislarining ishga tushirilishi, oliy ta’limda talabalarga qulayliklar yaratish, o‘quv jarayonini boshqarish samaradorligini oshirish, ochiqlik va shaffoflikni ta’minlash hamda xalqaro standartlarga moslashishga yordam beradi. Bu ofislar oliy o‘quv yurtlarining o‘quv jarayonini optimallashtirishda va sifatli ta’limni ta’minlashda muhim rol o‘ynaydi.

Registrator ofisi nima?

Registrator ofisi (yoki registrar’s office) – bu oliy o‘quv yurtlarida talabalarning o‘quv jarayoni bilan bog‘liq barcha ma’lumotlar, hujjatlar va xizmatlar yuritiladigan bo‘limdir. U talabalar va oliy o‘quv yurti o‘rtasida o‘ziga xos ko‘prik vazifasini bajaradi.

Registrator ofisining afzalliklari:

• Talabalar uchun qulaylik;
• O‘quv jarayoniga oid barcha ma’lumotlar bir joyda jamlangan;
• Hujjatlarni rasmiylashtirish va olish osonlashtirilgan;
• O‘quv jarayonidagi savollarga tez va aniq javoblar olish;
• O‘quv dasturlari va tanlov fanlari haqida ma’lumot olish imkoniyati;
• O‘quv yurti uchun samaradorlik;
• O‘quv jarayonini samarali boshqarish;
• Talabalar ma’lumotlarini tartibli saqlash va boshqarish;
• hujjatlarni tez va sifatli tayyorlash;
• O‘quv jarayoni haqidagi ma’lumotlarni tahlil qilish imkoniyati;
• Oliy o‘quv yurtining xalqaro reytinglardagi o‘rnini yaxshilashga yordam beradi;
• Ochiqlik va adolat;
• Talabalarning akademik ma’lumotlari shaffof va adolatli tarzda yuritiladi;
• Hujjatlarni tayyorlashda korrupsiya holatlarining oldi olinadi;
• Zamonaviylik:

Registrator ofislar ko‘pincha zamonaviy texnologiyalardan (elektron platformalar, onlayn tizimlar) foydalanadi. Bu o‘z navbatida talabalar va o‘quv yurtlari o‘rtasidagi aloqalarni yanada samarali qiladi.

Xalqaro standartlarga muvofiqlik:

• Registrator ofisi xalqaro standartlarga mos keladigan oliy ta’limni boshqarish modelidir.
• Bu oliy o‘quv yurtining xalqaro hamkorligini rivojlantirishga yordam beradi.