Toshkent davlat iqtisodiyot universiteti Samarqand filialida yangi o‘quv yiliga bag‘ishlangan tantanali tadbir bo‘lib o‘tdi

Tadbir avvalida filial direktori, iqtisod fanlari doktori, professor Olim Murtazaev samimiy tabrik nutqi bilan ishtirokchilarga murojaat qildi. O‘z nutqlarida yurtimizda oliy ta’lim sohasiga berilayotgan yuksak e’tibor, xususan, TDIU Samarqand filiali professor-o‘qituvchilari va talabalarining ilmiy-amaliy yutuqlari, filialning ortib borayotgan ilmiy salohiyati hamda istiqbolda amalga oshirilishi rejalashtirilayotgan ilmiy-tadqiqot ishlari haqida alohida ta’kidlab o‘tdilar.

Bu so‘zlar yig‘ilganlarga katta ruhiy ko‘tarinkilik bag‘ishlab, ularni yangi marralar sari ilhomlantirdi. 

 Tadbirning keyingi qismida esa magistratura bosqichi talabalari hamda iqtidorli yoshlar o‘z chiqishlari bilan qatnashib, yangi o‘quv yilida erishgan yutuqlari, olib borayotgan ilmiy izlanishlari va muvaffaqiyatlarini taqdim etdilar. Ularning nutqlari filial talabalari uchun haqiqiy namuna bo‘lib xizmat qildi.

 Shuningdek, joriy yilda TDIU Samarqand filialiga qabul qilingan yangi talabalar ham sahnaga chiqib, o‘z quvonchlarini ifoda etdilar. Ular talabalik hayotiga ilk qadam qo‘yganliklaridan mamnun ekanliklarini bildirib, kelajakdagi orzu-intilishlari bilan o‘rtoqlashdilar. Ularning ko‘zida faxr, qalblarida esa yuksak marralar sari intilish mujassam edi. 

 Tadbir yakunida esa barcha yangi qabul qilingan talabalarimizga ilm yo‘lida omad, ulkan yutuqlar va yorqin kelajak tilandi.

Tadbirdan lavhalar