TDIU Samarqand filialida navbatdagi Kengash yig‘ilishi va e’tirof marosimi bo‘lib o‘tdi

2025-yil 1-noyabr kuni Toshkent davlat iqtisodiyot universiteti Samarqand filialida Kengashning 3-sonli yig‘ilishi bo‘lib o‘tdi. Yig‘ilish filialning “A” binosi majlislar zalida o‘tkazildi va unda filial rahbariyati, bo‘lim boshliqlari, kafedra mudirlari hamda professor-o‘qituvchilar ishtirok etdilar.

Kun tartibidan muhim masalalar o‘rin oldi. Jumladan, Prezident qarorlari, Farmonlari, Vazirlar Mahkamasi qarorlari va Oliy ta’lim, fan va innovatsiyalar vazirligi hujjatlarining ijrosi, shuningdek, ijro intizomi va murojaatlar bilan ishlash holati yuzasidan Sh. Vafoyeva tomonidan batafsil axborot tinglandi.

Shuningdek, o‘quv jarayonini takomillashtirish, yuqori malakali kadrlar tayyorlash tizimini rivojlantirish bo‘yicha amalga oshirilayotgan chora-tadbirlar to‘g‘risida filial direktori o‘rinbosari F. Axrorov ma’lumot berdi.
“O‘zbek tili va xorijiy tillar” kafedrasida “Yo‘l xaritasi”da belgilangan vazifalarning bajarilishi yuzasidan B. Mirsanov hamda Z. Bobomurodov hisobot berdilar.

Yig‘ilish davomida xalqaro hamkorlik masalalari muhokama qilinib, xorijiy universitetlar bilan aloqalarni kengaytirish, xorijiy mutaxassislarni jalb etish borasida O. Muydinov axborot berdi.

Kun tartibining yakuniy qismida tanlov asosida lavozimlarga saylash, ilmiy darajali xodimlarga qo‘shimcha haq miqdorini tasdiqlash, shuningdek, Buxgalteriya hisobi va moliya fakulteti “O‘zbek tili va xorijiy tillar” kafedrasi mudiri, filologiya fanlari bo‘yicha falsafa doktori, dotsent B. Mirsanovning “Nemis tili terminologiyasida ikkilamchi nomlashlar va ularning motivlashuvi” nomli monografiyasini chop etishga tavsiya etish masalalari ko‘rib chiqildi.

 Yig‘ilishning eng muhim onlaridan biri — TDIU Samarqand filiali direktori, O‘zXDP a’zosi, xalq deputatlari Samarqand shahar kengashi deputati Olim Murtazaevning O‘zbekiston Respublikasi Oliy ta’lim, fan va innovatsiyalar vazirligi tashakkurnomasi bilan taqdirlanishi bo‘ldi.

Mazkur tashakkurnoma Olim Murtazaevning ko‘p yillik samarali mehnati, ta’lim tizimini rivojlantirishdagi katta hissasi hamda o‘z xizmat burchiga bo‘lgan sadoqati uchun berildi.
Taqdirlash marosimida vazirlik vakillari Murtazaev Olimning ta’lim sohasidagi yirik tajribasi va yoshlarni bilimli, vatanparvar, zamonaviy mutaxassislar sifatida tarbiyalashdagi xizmatlarini alohida e’tirof etdilar.

 Taqdirlash jarayonida direktorga O‘zbekiston Respublikasi Oliy ta’lim, fan va innovatsiyalar vaziri K. Sharipov tomonidan imzolangan rasmiy Tashakkurnoma topshirildi.

Bu e’tirof — nafaqat rahbar shaxsiga, balki butun TDIU Samarqand filiali jamoasining fidokorona mehnati, yurtimiz ta’lim tizimi rivojiga qo‘shgan hissasi va yuksak mas’uliyat bilan olib borilayotgan faoliyatining e’tirofidir.