Toshkent davlat iqtisodiyot universiteti Samarqand filiali “Ekologiya va yashil iqtisodiyot” ilmiy fan klubi rahbari Z. Bobomurodov 2025-yil 4–9-sentabr kunlari “Zomin” sanatoriyasi hududida bo‘lib, “Zomin” davlat qo‘riqxonasi faoliyati bilan yaqindan tanishdi.

Tashrif davomida qo‘riqxonaning tabiiy sharoitlari, flora va faunasi, ekoturizm maskanlari hamda ekotizimning muhofaza qilinishi masalalari o‘rganildi. Zomin davlat qo‘riqxonasi hududi asosan Zomin va Baxmal tumanlarida joylashgan bo‘lib, dengiz sathidan 1700 metrdan 4029 metrgacha balandlikdagi uch zonani qamrab oladi.

Qo‘riqxona o‘simliklar dunyosida 105 oila, 530 turkumga mansub 1216 tur uchrasa, hayvonot olamida qushlarning 102 turi, sut emizuvchilarning 30 turi, sudralib yuruvchilarning 14 turi, baliqlarning 1 turi va suvda-quruqlikda yashovchilarning 2 turi mavjud. Shuningdek, “Boyqo‘ng‘ir tabiati”, “Qirq kiz I”, “Chortangi darasi”, “Ko‘lsoy tabiati” va “Qoshqa suv” kuzatuv markazi kabi ekoturistik marshrutlar xorijiy va mahalliy sayyohlarni o‘ziga jalb etmoqda.

Tadbir davomida Z. Bobomurodov yosh sayyohlarga qo‘riqxona hududini asrash va tabiatni muhofaza qilish bo‘yicha tushunchalar berdi.