O‘zbekiston Respublikasi Prezidenti Shavkat Miromonovich Mirziyoyevning yoshlar bilan ularning tashabbuslarini qo‘llab-quvvatlash bo‘yicha qo‘shimcha imkoniyatlarga bag‘ishlangan muloqoti yuzasidan Toshkent davlat iqtisodiyot universiteti Samarqand filiali direktori Olim Murtazayevning

MUROJAATI

Hurmatli professor-o‘qituvchilar, aziz talabalar va filialimiz jamoasi!

Shu yilning 24-fevral kuni Prezidentimizning Ko‘ksaroy qarorgohida 60 mingdan ortiq yoshlar bilan o‘tkazilgan ochiq va samimiy muloqoti mamlakatimiz taraqqiyotida muhim bosqich bo‘ldi. Ushbu uchrashuvda yoshlar siyosatini yangi sifat darajasiga olib chiqish, ularning tashabbuslarini tizimli qo‘llab-quvvatlash hamda zamonaviy bilim va kasb-hunarlarni egallashi uchun keng imkoniyatlar yaratish bo‘yicha ustuvor vazifalar belgilandi. Zero, davlatimiz rahbari tomonidan yoshlar tadbirkorligini kengaytirish va startap loyihalarni moliyaviy qo‘llab-quvvatlash, innovatsion tashabbuslarni rag‘batlantirish; xorijiy tillar va raqamli kasblarni chuqur o‘rganish; volontyorlik harakatini rivojlantirish, talabalar bandligini ta’minlash kabi jihatlarga alohida e’tibor qaratildi.

Muloqot davomida haftaning har payshanba kuni “Yoshlar kuni” deb e’lon qilinishi bizning yoshlar bilan bevosita muloqotni kuchaytirishimizni, ochiqlik, mas’uliyat va natijadorlik tamoyillariga amal qilishimizni yanada mustahkamlaydi. Natijada mamlakatimiz kelajagi bo‘lgan yoshlarning barkamol o‘sishi va rivojlanishi hamda kelajakda jamiyatning to‘laqonli a’zosi bo‘lib shakllanishiga erishiladi.

Biz raqamli iqtisodiyot va axborot texnologiyalari sohasining zamonaviy, raqobatbardosh mutaxassislarini tayyorlashni o‘z oldimizga maqsad qilib qo‘yganmiz. Shu bois ta’lim sifatini oshirish, iqtisodiyotning zamonaviy qonuniyatlarini o‘qitish va amaliyotga joriy etish hamda yoshlarning innovatsion g‘oyalarini qo‘llab-quvvatlashni asosiy ustuvor vazifamiz deb hisoblaymiz.

“President Tech Award”, freelancing va onlayn biznes kurslari, IT Park bilan hamkorlikdagi amaliyot dasturlari muvaffaqiyatli amalga oshirilmoqda. Filialda nazariya va amaliyot uyg‘unligini ta’minlash uchun 1298 nafar kunduzgi ta’lim talabalaridan 520 nafari dual ta’lim shaklida o‘qitilmoqda, talabalar kreativ g‘oyalari qo‘llab-quvvatlanmoqda, ular tomonidan yaratilayotgan startap loyihalar har oy 10 tadan amaliyotga joriy etilmoqda. “Ishla va sayohat qil (Work and Travel)” dasturi asosida har yili 300 nafarga yaqin talabalarimizning borishiga ko‘maklashamiz, sportga talabalarni keng jalb qilishni kuchaytiramiz, stol tennisi sport turini alohida rivojlantiramiz va yoshlarimizning chempion bo‘lishlari uchun barcha zarur sharoitlarni yaratamiz, bu jarayonlarda oliygoh bosh islohotchi bo‘lishini ta’minlaymiz.

Bitiruvchi talabalarda tadbirkorlik ko‘nikmalarini shakllantirish va bitiruvchilarning o‘z bandligini ta’minlashi uchun “Kelajakka qadam” dasturi asosida har oy kamida 2 nafar talabaning kredit mablag‘larini olishi uchun amaliy yordam beramiz. Filialimizdagi 601 nafar bitiruvchi talabalarni o‘z mutaxassisligi bo‘yicha bosqichma-bosqich bandligini 100 foiz ta’minlaymiz.

Prezidentimiz tashabbuslari asosida ushbu yo‘nalishlarni yanada kengaytirib, har bir talabamizning kamida 1 ta loyiha yoki amaliy ish tajribasiga ega bo‘lishini ta’minlaymiz.

Hurmatli jamoa a’zolari! Har bir ilg‘or g‘oya, har bir innovatsion taklif biz uchun qadrlidir. Birgalikdagi sa’y-harakatlarimiz bilan filialimizni nafaqat mintaqada, balki respublika miqyosida ta’limning yetakchi markaziga aylantirish yo‘lida izchil harakat qilamiz.

Aziz yoshlar, talabalar, sizlarning intilish va tashabbuslaringiz — Yangi O‘zbekistonning eng katta boyligidir. Prezidentimiz tomonidan yaratilayotgan imkoniyatlardan samarali foydalanib, bilim va salohiyatingizni Vatan ravnaqi yo‘lida safarbar etishingizga ishonamiz!