Dunyodagi har uch nafar xotin-qizlarning biri hayoti davomida jismoniy yoki jinsiy zo‘ravonlikka uchragan. Bunday jinoyatni tag-tomiri bilan yo‘q qilish maqsadida USAID butun dunyodagi mamlakatlarga xotin-qizlarga nisbatan zo‘ravonlikka, jumladan oiladagi zo‘ravonlik, jinsiy zo‘rlash va odam savdosiga qarshi qaratilgan qonunchilikni ishlab chiqishda yordam beradi. Bunday sa’y-harakatlar nafaqat zo‘ravonlikdan jabr ko‘rganlarning salomatligini yaxshilashni, balki ularga bu borada o‘zgarish yasash uchun tarafdor-himoyachi bo‘lishga imkon yaratishni ham maqsad qiladi. Xalqaro va alohida davlatlar darajasida olib borilayotgan ayollar va bolalarga nisbatan zo‘ravonlikka qarshi kurash va uning oldini olish global miqyosda inson huquqlari va gender tenglikni ta’minlashning muhim yo‘nalishi hisoblanadi.

Mamlakatimizda ham xotin-qizlarga nisbatan zo‘ravonlikka qarshi bir qancha ma’rifiy tadbirlar o‘tkazilib, keng jamoatchilikka gender tengligining mazmuni, mazkur sohada amalga oshirilayotgan ishlar va qonunchilikka kiritilgan o‘zgartirishlar to‘g‘risida ma’lumotlar berib borilmoqda.

Aholi, ayniqsa yoshlar o‘rtasida zo‘ravonlikning har qanday shakllariga nisbatan murosasizlikni shakllantirish ayollarga nisbatan zo‘ravonlikni bartaraf etishning muhim sharti hisoblanadi. Yoshlar bilan huquqiy madaniyatni oshirish bo‘yicha ish olib borish, jinsidan qat’i nazar, barcha fuqarolar uchun yashash huquqi va daxlsizlik huquqini ta’minlashning ustuvorligini tushuntirish zarurligi haqida to‘xtalib o‘tildi.