2025-yil 7-fevral kuni Toshkent davlat iqtisodiyot universiteti Samarqand filiali Iqtisodiyot fakulteti 1-bosqich 124-guruh talabalari ta’lim-tarbiya maslahatchisi O. Norboyev boshchiligida “Milliy qadriyatlar va ularning millat ma’naviyatidagi o‘rni” shiori ostida Hunarmand uyushmasi Samarqand viloyat boshqarmasiga sayohat uyushtirdi.

Sayohat davomida talabalar milliy hunarmandchilikning turli yo‘nalishlari bilan yaqindan tanishib, milliy cholg‘u asboblari hamda hunarmandlik namunalari haqida qiziqarli ma’lumotlarga ega bo‘lishdi. Hunarmand uyushmasi nafaqat o‘z davrida, balki hozirgi kunda ham katta ahamiyatga ega bo‘lib, milliy san’atimizni rivojlantirish va xorijiy sayyohlarni jalb etishda muhim rol o‘ynamoqda.

Mazkur tadbir talabalarni milliy qadriyatlar va an’anaviy hunarmandchilik merosi bilan tanishtirishda muhim ahamiyat kasb etdi. Bunday tashabbuslar yoshlarning ma’naviy dunyoqarashini boyitish, milliy o‘ziga xoslikni anglash va kelajak avlodga qadriyatlarni yetkazish yo‘lida katta ahamiyatga ega ekanini yana bir bor isbotladi.