2024-yil 17-yanvar kuni Toshkent davlat iqtisodiyot universiteti Samarqand filiali Iqtisodiyot fakulteti tashabbusi bilan filial kutubxonasida “Kitobsevar millat” umummilliy g‘oyasini ro‘yobga chiqarish maqsadida talaba-yoshlar o‘rtasida kitobxonlik madaniyatini shakllantirish va ularni kitob o‘qishga keng jalb qilishga qaratilgan tadbir tashkil etildi. Tadbir davomida O‘zbek adabiyotining mashhur asarlari – Abdulhamid Cho‘lponning “Kecha va Kunduz” asari, Abdulla Qodiriyning “Mehrobdan Chayon” romani va Odil Yoqubovning “Ulug‘bek Xazinasi” badiiy asarlari targ‘ib qilindi. Ushbu asarlarning mazmuni, ularning milliy adabiyot va tarixdagi o‘rni haqida batafsil ma’lumot berildi. Talabalar kitoblarning mazmuni bilan tanishib, ularning ijtimoiy, ma’naviy va tarbiyaviy ahamiyatini anglash imkoniga ega bo‘ldilar. Tadbirning asosiy maqsadi talabalar orasida kitobga bo‘lgan qiziqishni oshirish, ularning adabiy bilimlarini boyitish hamda kitobxonlik madaniyatini rivojlantirish edi. Asarlar muhokamasi jarayonida talaba yoshlar o‘z fikrlarini bayon qilib, asarlardan olgan taassurotlari bilan o‘rtoqlashdilar. Shu bilan birga, o‘zbek adabiyotining buyuk ijodkorlari yaratgan badiiy boyliklarning yosh avlod tarbiyasidagi o‘rni yana bir bor ta’kidlandi. Mazkur tadbir yoshlar orasida kitobga bo‘lgan mehrni kuchaytirishga, ularni ma’naviy rivojlantirishga va milliy qadriyatlarni yanada chuqurroq anglashga xizmat qiluvchi muhim tashabbus sifatida alohida e’tiborga loyiqdir.