Toshkent davlat iqtisodiyot universiteti Samarqand filiali tomonidan startap loyihalar tanlovi e’lon qilinmoqda. Tanlovning asosiy maqsadi filial va mahallalarda istiqomat qiluvchi iqtidorli va iste’dodli yoshlarning innovatsion faoliyati natijalari hamda tashabbuslarini qo‘llab-quvvatlash, yoshlarning innovatsion loyihalarini rag‘batlantirish uchun zarur shart-sharoitlarni yaratishdan iborat. Ushbu tanlov innovatsion g‘oyalarni biznesga aylantirish uchun muhim imkoniyat hisoblanadi.

Tanlov doirasida eng yaxshi deb topilgan startap loyihalari moliyalashtiriladi hamda respublika va xalqaro miqyosdagi grant tanlovlarida ishtirok etish uchun tavsiya etiladi. Shuningdek, tanlov g‘oliblari mentorlar ko‘magida doimiy ravishda rivojlantiriladi va Toshkent davlat iqtisodiyot universiteti Samarqand filialida tashkil etiladigan boshqa tanlovlar doirasida yutuq sifatida e’tirof etiladi.

Tanlov doirasida arizalar 2026-yil 10-fevral kunidan 28-fevral kuni soat 23:59 ga qadar qabul qilinadi. Tanlovga taqdim etiladigan arizalar belgilangan hujjat shakllari asosida to‘ldirilgan holda Xushnud Kazakovga Telegram messenjeri orqali +998 90 601 65 50 raqami orqali taqdim etiladi. Qo‘shimcha ma’lumotlar uchun murojaat telefoni: +998 94 642 30 02 (Jonibek Bo‘riboyev).

Taqdim etilgan hujjatlar “Bo‘lajak olim” tanlovi talablariga mos ravishda to‘liq va rasmiylashtirilgan holda topshirilishi, shuningdek, undagi ma’lumotlarning haqqoniyligi va ishonchliligi uchun ariza mualliflari shaxsan javobgar hisoblanadi. Tanlov dasturida belgilangan vazifalar va kutilayotgan natijalar to‘liq, sifatli va belgilangan muddatlarda bajarilishi lozim.

Startap loyiha tanlovi shartlari

1. Umumiy qoidalar
Ushbu tanlov innovatsion va tijoratlashuv salohiyatiga ega startap loyihalarni aniqlash hamda qo‘llab-quvvatlash maqsadida tashkil etiladi. Tanlov tashkilotchisi Toshkent davlat iqtisodiyot universiteti Samarqand filiali hisoblanadi. Tanlov ochiq va bepul asosda o‘tkaziladi. Tanlov yakunlariga ko‘ra g‘oliblar aniqlanadi va mukofotlanadi.

2. Tanlov ishtirokchilari
Tanlovda barcha talabalar va yosh tadqiqotchilar, 2–5 nafar a’zodan iborat startap jamoalari hamda mahallalar yoshlari ishtirok etishi mumkin. Har bir ishtirokchi yoki jamoa tanlovda faqat bitta loyiha bilan qatnashishi mumkin.

3. Loyiha yo‘nalishlari
Tanlov barcha yo‘nalishlarda tashabbusli startap loyihalar shaklida o‘tkaziladi.

4. Tanlov bosqichlari
Tanlov arizalarni qabul qilish, saralash, loyiha taqdimoti va g‘oliblarni aniqlash bosqichlaridan iborat. Saralashdan o‘tgan ishtirokchilar 5–7 daqiqa davomida loyiha taqdimotini amalga oshiradilar.

5. Baholash mezonlari
Loyihalar innovatsionlik darajasi, muammo va yechimning dolzarbligi, bozor salohiyati va daromad modeli, texnik va amaliy amalga oshirish imkoniyati, jamoaning salohiyati hamda taqdimot sifati asosida baholanadi.

6. Hujjatlar va talablar
Ishtirokchilar to‘ldirilgan ariza shakli hamda belgilangan hajmdagi loyiha tavsifini taqdim etishlari shart.

7. Mukofotlar
Birinchi o‘rin g‘olibi loyiha prototipini yaratish uchun moliyalashtiriladi va sertifikat bilan taqdirlanadi. Ikkinchi va uchinchi o‘rin sohiblari sertifikat bilan taqdirlanadi. Qo‘shimcha ravishda mentorlik dasturi, inkubatsiya va akseleratsiya imkoniyati hamda investorlar bilan uchrashuvlar tashkil etiladi.

8. Intellektual mulk huquqi
Tanlov doirasida taqdim etilgan barcha loyihalarning intellektual mulk huquqi loyiha mualliflariga tegishli bo‘lib qoladi. Tashkilotchi loyihalardan faqat tanlovni targ‘ib qilish maqsadida foydalanishi mumkin.

9. Yakuniy qoidalar
Tashkilotchi tanlov shartlariga o‘zgartirish kiritish huquqini o‘zida saqlab qoladi. Bahsli holatlarda hakamlar hay’ati qarori yakuniy hisoblanadi. Tanlovda ishtirok etish ushbu shartlarga to‘liq rozilik bildirilganligini anglatadi.