21-iyul kuni TDIU Samarqand filialida psixolog N.Atabayeva tashabbusi bilan navbatdagi kitobxonlik tadbiri bo‘lib o‘tdi. Ushbu uchrashuvning asosiy maqsadi — talabalar o‘rtasida mutolaa madaniyatini rivojlantirish, ularning dunyoqarashini kengaytirish hamda badiiy adabiyot orqali ma’naviy yetuklikka erishishdir.

Tadbir davomida talabalar o‘zlari yaqinda o‘qigan asarlar haqida batafsil fikr almashishdi, sevimli qahramonlarining xarakterini muhokama qilishdi va mualliflarning asarlardagi g‘oyalarini birgalikda tahlil qilishdi. Bu jarayon talabalarning nafaqat nutq madaniyatini, balki mantiqiy va tanqidiy fikrlash ko‘nikmalarini rivojlantirdi.

Psixolog N.Atabayeva esa kitob mutolaasining ruhiy barqarorlik, tafakkur kengligi va ijobiy dunyoqarash shakllanishidagi ahamiyati haqida batafsil to‘xtaldi. Unga ko‘ra, kitob o‘qish insonni ruhiy jihatdan boyitadi, mustaqil fikrlashni rivojlantiradi va hayotga yangicha nigoh bilan qarash imkonini beradi.

 Bunday tadbirlar filialda an’anaviy tus olib, muntazam tashkil etib kelinmoqda. Ular talabalarning intellektual salohiyatini oshirish, ijodiy izlanishga rag‘batlantirish va ilmiy hamda badiiy bilimlarni uyg‘unlashtirishga xizmat qilmoqda.