Hamkorliklar kengaymoqda: TDIU Samarqand filiali IAMO bilan yangi memorandum imzoladi

Berlin Forumidagi rasmiy uchrashuvlar doirasida TDIU Samarqand filiali direktori, professor Olim Murtazaev Germaniyaning qishloq xo‘jaligi iqtisodiyoti bo‘yicha yetakchi ilmiy markazlaridan biri — IAMO (Leibniz Institute for Agricultural Development in Transition Economies) bilan hamkorlik memorandumini imzoladi.

Ushbu memorandum Berlin Forumida imzolangan navbatdagi muhim kelishuv bo‘lib, filialning xalqaro ilmiy-tadqiqot va ta’lim hamkorliklari izchil kengayayotganini yana bir bor tasdiqlaydi.

 Hamkorlik quyidagi asosiy yo‘nalishlarni qamrab oladi:

•  Qishloq xo‘jaligi iqtisodiyoti, barqaror rivojlanish va oziq-ovqat xavfsizligi bo‘yicha qo‘shma ilmiy tadqiqotlar;

•  IAMO ilmiy markazlari va laboratoriyalarida talaba hamda yosh tadqiqotchilar uchun stajirovkalar;

•  PhD va magistratura darajasida qo‘shma ilmiy rahbarlik va ilmiy maktablar yaratish;

•  Qo‘shma seminarlar, ilmiy konferensiyalar, trening va workshoplar tashkil etish;

•  Xalqaro grant dasturlari bo‘yicha qo‘shma arizalar tayyorlash va ilgari surish.

 Yaquin kunlarda yangi qo‘shma ilmiy loyiha uchun talabnoma ishlab chiqish ishlari boshlanadi.

 Ushbu memorandum O‘zbekistonda qishloq xo‘jaligi iqtisodiyoti va agrar soha bo‘yicha ilmiy tadqiqotlar sifatini yangi bosqichga ko‘tarib, xalqaro ilmiy almashinuv imkoniyatlarini yanada kengaytiradi.