RASMIY MUROJAAT

Hurmatli professor-o‘qituvchilar, aziz talabalar va filialimiz jamoasi!

Joriy yil 24-fevral kuni O‘zbekiston Respublikasi Prezidenti Shavkat Mirziyoyev tomonidan Ko‘ksaroy qarorgohida 60 mingdan ortiq yoshlar bilan o‘tkazilgan ochiq va samimiy muloqot mamlakatimiz taraqqiyotida muhim bosqich bo‘ldi. Mazkur uchrashuvda yoshlar siyosatini yangi sifat darajasiga olib chiqish, ularning tashabbuslarini tizimli qo‘llab-quvvatlash hamda zamonaviy bilim va kasb-hunarlarni egallashi uchun keng imkoniyatlar yaratish bo‘yicha ustuvor vazifalar belgilandi.

Davlatimiz rahbari tomonidan quyidagi yo‘nalishlarga alohida e’tibor qaratildi:

• yoshlar tadbirkorligini kengaytirish va startap loyihalarni moliyaviy qo‘llab-quvvatlash;

• innovatsion tashabbuslarni rag‘batlantirish;

• xorijiy tillar va raqamli kasblarni chuqur o‘rganish;

• volontyorlik harakatini rivojlantirish;

• talabalar bandligini ta’minlash va ularning amaliy tajribasini oshirish.

Haftaning har payshanba kunining “Yoshlar kuni” deb e’lon qilinishi davlat idoralari rahbarlarining yoshlar bilan bevosita muloqotini kuchaytirishga xizmat qiladi. Bu esa ochiqlik, mas’uliyat va natijadorlik tamoyillarini yanada mustahkamlaydi.

Toshkent davlat iqtisodiyot universiteti Samarqand filiali jamoasi sifatida biz ushbu vazifalarni amalga oshirishda o‘zimizni bevosita mas’ul deb bilamiz.
Biz raqamli iqtisodiyot va axborot texnologiyalari sohasining zamonaviy, raqobatbardosh mutaxassislarini tayyorlaymiz.
Shu bois ta’lim sifatini oshirish va sun’iy intellekt texnologiyalarini chuqur o‘qitish, nazariya va amaliyot uyg‘unligini ta’minlash hamda talabalar startaplarini qo‘llab-quvvatlash asosiy ustuvor vazifamizdir.

Filialda “President Tech Award”, freelancing va onlayn biznes kurslari, IT Park bilan hamkorlikdagi amaliyot dasturlari muvaffaqiyatli amalga oshirilmoqda. Endilikda Prezidentimiz tashabbuslari asosida ushbu yo‘nalishlarni yanada kengaytirib, har bir talabamizning kamida bitta real loyiha yoki amaliy ish tajribasiga ega bo‘lishini ta’minlashni maqsad qilganmiz.

Hurmatli jamoa a’zolari!
Har bir ilg‘or g‘oya, har bir innovatsion taklif biz uchun qadrlidir. Birgalikdagi sa’y-harakatlarimiz bilan filialimizni nafaqat mintaqada, balki respublika miqyosida axborot texnologiyalari va raqamli ta’limning yetakchi markaziga aylantirish yo‘lida izchil harakat qilamiz.

Yoshlar – Yangi O‘zbekistonning tayanchi va kelajagidir.