2025-yil 8-iyul kuni Toshkent davlat iqtisodiyot universiteti Samarqand filialining o‘quv ishlari bo‘yicha direktor o‘rinbosari, iqtisod fanlari doktori, professor Farhod Axrorov Ruminiyaning Oradea universitetiga rasmiy tashrif buyurdi. Ushbu tashrif O‘zbekiston oliy ta’lim tizimining xalqaro integratsiyasini yanada chuqurlashtirish va ilmiy-akademik hamkorlikni kengaytirish yo‘lida muhim qadamlardan biri bo‘ldi.

Tashrif doirasida professor F.Axrorov Oradea universiteti prorektori, taniqli tarixchi olim, professor Sorin Şipoş bilan uchrashdi. Suhbat chog‘ida ikki tomonlama akademik aloqalarni mustahkamlashga qaratilgan qator kelishuvlarga erishildi.

Uchrashuv yakunida quyidagi yo‘nalishlarda hamkorlik bo‘yicha kelishuvlarga erishildi:

•  Ikki tomonlama hamkorlik memorandumi imzolandi. Mazkur hujjat tomonlar o‘rtasidagi rasmiy hamkorlik asosini belgilab berdi hamda kelgusi loyihalar uchun huquqiy zamin yaratdi.

•  Erasmus+ dasturi doirasida talabalar va professor-o‘qituvchilar almashinuvini yo‘lga qo‘yish bo‘yicha kelishuvga erishildi. Bu esa O‘zbekiston va Ruminiya oliy ta’lim muassasalari o‘rtasida transmilliy ta’lim imkoniyatlarini kengaytiradi.

•  Qo‘shma ilmiy tadqiqotlar olib borish rejalashtirildi. Bu ilmiy salohiyatni oshirish, ilmiy maqolalar chop etish va xalqaro reytinglarda faollikni kuchaytirishga xizmat qiladi.

Shuningdek, professor Farhod Axrorov Oradea universitetining Iqtisodiyot fakultetida mehmon bo‘lib, u yerda ta’lim jarayonlari, ilmiy faoliyat va xalqaro hamkorlik tajribasi bilan tanishdi. Tashrif davomida bo‘lib o‘tgan uchrashuvlar va muzokaralar ikki tomonlama hamkorlikni sifat jihatidan yangi bosqichga olib chiqishga xizmat qilishi kutilmoqda.

Tashrif davomida olingan foto lavhalar va batafsil ma’lumotlar Oradea universitetining rasmiy veb-sahifasida e’lon qilingan.
Batafsil:
Oradea universiteti rasmiy sahifasi