Oliy ta'lim tizimida amalga oshirilayotgan islohotlar mamlakatimizning barqaror rivojlanishi va raqobatbardosh inson kapitalini shakllantirishga qaratilgan muhim yo'nalishlardan biridir. Prezidentimiz Shavkat Mirziyoyev tomonidan belgilangan ustuvor yo'nalishlar asosida oliy ta'lim tizimini tubdan isloh qilish jarayoni davom etmoqda.

Xususan, korrupsiyaga qarshi kurashish bo‘yicha olib borilayotgan chora-tadbirlar ta'lim tizimining shaffofligini ta’minlash, kadrlar tanlovining adolatli amalga oshirilishi va ilmiy salohiyatni oshirishga xizmat qiladi. Bu borada davlat rahbarining "Korrupsiya jamiyat tanasidagi saraton" degan fikri oliy ta'lim tizimi uchun ham dolzarbdir. Oliy ta’lim muassasalarida ochiqlik va hisobdorlikni oshirish, professor-o‘qituvchilarning ilmiy va pedagogik faoliyatini adolatli baholash orqali akademik sohada korrupsiya holatlarining oldini olish zarur.

Talabalar qabuli tizimining o'zgartirilishi, kredit-modul tizimiga o'tish oliy ta'limda ildiz olib ketgan korruptsiyani tezlikda bartaraf etish imkonini berdi. Ushbu tizim ta'lim jarayonining shaffofligini oshirish, har bir talabaning bilim va ko‘nikmalarini xolis baholash imkoniyatini yaratdi. Natijada, oliy ta’lim muassasalarida ochiqlik va adolat mezonlari asosida kadrlar tanlab olinishi, akademik halollik tamoyillari mustahkamlanishi ta’minlanmoqda.

Shuningdek, oliy ta’lim muassasalarida davlat xizmatiga halol, malakali va raqobatbardosh kadrlarni yetkazib berish maqsadida ta’lim jarayonining sifatini oshirish, ilmiy izlanishlarni amaliyot bilan uyg‘unlashtirish, ta’lim dasturlarini xalqaro talablar asosida yangilash muhim vazifalardan biridir. Ta’lim sifatini oshirishda kadrlar tayyorlash jarayonini korruptsiyadan xoli holda tashkil etish, byurokratik to‘siqlarni bartaraf etish va oliy ta’lim muassasalarining akademik va moliyaviy mustaqilligini kengaytirish masalalari ustuvor yo‘nalish sifatida belgilangan.

Davlatimiz rahbari tomonidan ilgari surilgan islohotlar doirasida oliy ta’lim tizimida inson kapitaliga bo‘lgan e’tibor keskin ortib, har bir talabaga teng imkoniyatlar yaratish, o‘qitish jarayonida shaffof va innovatsion yondashuvlarni joriy qilish asosiy maqsad qilib qo‘yilgan. Shu boisdan, oliy ta’lim tizimidagi islohotlarning samaradorligini oshirish uchun jamoatchilik, ilmiy doiralar va keng auditoriya ishtirokida muhokamalarni yo‘lga qo‘yish, professor-o‘qituvchilar va talabalar faolligini rag‘batlantirish lozim.

Kelajakda ta’lim tizimining yanada rivojlanishi uchun akademik sohada ochiqlik va halollikni mustahkamlash, zamonaviy bilimlarni yetkazib berish va xalqaro hamkorlikni kuchaytirish orqali oliy ta’lim muassasalarini yanada raqobatbardosh qilishga erishiladi. Bu esa, o‘z navbatida, ilmiy tadqiqotlar va amaliy ishlanmalar orqali mamlakatimizni ijtimoiy-iqtisodiy taraqqiyotining yangi bosqichiga olib chiqishga xizmat qiladi.

Axrorov Farxod Baxriddinovich,
TDIU Samarqand filiali 
O'quv ishlari bo'yicha direktor o'rinbosari, iqtisod fanlari doktori.