Bugun, 2025-yil 28-noyabr kuni TDIU Samarqand filialida bitiruvchi talabalar uchun yil davomida eng kutilgan va eng muhim tadbirlardan biri — “Mehnat yarmarkasi – 2025” keng miqyosda o‘tkazildi. Ushbu tadbirning bosh maqsadi — yosh mutaxassislarni mehnat bozoridagi real imkoniyatlar bilan tanishtirish, korxona va tashkilotlar o‘rtasida samarali hamkorlikni yo‘lga qo‘yish hamda talabalarning karyera rejalari uchun mustahkam zamin yaratishdan iboratdir.

Yarmarka davomida o‘ndan ortiq yirik korxona va tashkilotlar o‘z vakansiyalarini taqdim etdi, faoliyat yo‘nalishlari haqida ma’lumot berib, talabalar bilan bevosita muloqot olib bordi. Bitiruvchilar esa o‘z bilim va ko‘nikmalarini namoyish qilish, rezyumelarini topshirish hamda kelajakdagi potensial ish beruvchilar bilan dastlabki suhbatlar o‘tkazish imkoniyatiga ega bo‘ldilar.

Tadbirning eng muhim jihatlaridan biri — o‘quv jarayonida olingan nazariy bilimlarni amaliyotga tatbiq etish, mehnat bozorining talab va ehtiyojlarini tushunish, kasbiy yo‘nalish bo‘yicha aniq maqsadlar shakllantirish imkoniyatining yaratilganidir. Yarmarka doirasida bo‘lib o‘tgan suhbatlar, maslahatlar va kelishuvlar bitiruvchilarning ertangi kunidagi yirik muvaffaqiyatlarining poydevori bo‘lib xizmat qiladi.

TDIU Samarqand filiali yoshlarning karyera rivoji, bandlik masalalari va ularning mehnat bozoriga moslashuvi bo‘yicha amaliy ko‘mak berishni davom ettiradi. Bugungi yarmarka esa minglab talabalarning yorqin kelajakka tashlagan ishonchli qadami bo‘ldi.