2025-yil 10-oktabr kuni Latviya hayotiy fanlar va texnologiyalar universitetining Xalqaro ikki tomonlama diplom dasturlarini muvofiqlashtirish bo‘yicha bosh mutaxassis Viktoriya Krištopane hamda tashqi aloqalar bo‘yicha kordinator Ilona Puķjānelar Toshkent davlat iqtisodiyot universiteti Samarqand filialiga tashrif buyurishdi.

Tashrif davomida mehmonlarga Iqtisodiyot fakulteti dekani G‘.Ibragimov va xalqaro aloqalar bo‘limi boshlig‘i O.Muydinovlar hamrohlik qildilar.

Mehmonlar o‘quv ishlari bo‘yicha direktor o‘rinbosari F.Ahrorov va qo'shma ta'lim kordinatori Sh.Yuldashev bilan ikki oliygoh o‘rtasidagi hamkorlik doirasida amalga oshirilayotgan qo‘shma ta’lim dasturlarining hozirgi holati, talabalarning o‘qish jarayoni va istiqboldagi yangi loyihalar haqida fikr almashdilar.

Filial direktori, professor O.Murtazayev va hamkor universitet vakili Viktoriya Krištopane “Axborot tizimlari va texnologiyalari” qo‘shma ta’lim dasturi talabalari uchun 2+2 shaklidan 1+3 shakliga o‘zgartirish bo‘yicha qo‘shimcha shartnomani imzoladilar. Bunda hamkor universitetda o‘qish davrida ta’lim sifati va talabalarning umumiy tajribasini oshirish maqsad qilingan. Kelgusi o‘quv yilidan boshlab talabalar 1-chi o‘quv yilini TDIU Samarqand filialida, qolgan 3 yilni esa hamkor universitetda tamomlaydilar.

Shuningdek, Latviya universiteti vakillari 1- va 2-bosqich talabalari bilan ochiq muloqot o‘tkazdilar. Uchrashuv davomida talabalarga Latviya ta’lim tizimi, o‘qish jarayonining afzalliklari, ikki diplomli dasturlar orqali yaratilayotgan imkoniyatlar haqida batafsil ma’lumot berildi. Talabalar o‘zlarini qiziqtirgan savollarni berib, xorijlik mutaxassislardan amaliy tajriba, o‘qish sharoitlari va xalqaro almashinuv dasturlari haqida batafsil javoblar oldilar.

Uchrashuv samimiy muhitda o‘tdi va tomonlar o‘zaro hamkorlikni yanada mustahkamlash, magistratura bo‘yicha yangi qo‘shma dasturlarni tashkil etish masalalarini muhokama qildilar.

Ma’lumot uchun: 2020–2021 o‘quv yilidan boshlab TDIU Samarqand filiali va Latviya hayotiy fanlar va texnologiyalar universiteti o‘rtasida tuzilgan xalqaro shartnomaga asosan, 2+2 shaklida “Axborot tizimlari va texnologiyalari” (Barqaror rivojlanish uchun axborot texnologiyalari) hamda “Iqtisodiyot” (Barqaror iqtisodiyot va hududiy rivojlanish) yo‘nalishlari bo‘yicha qo‘shma ta’lim dasturlari amalga oshirilmoqda.