2025-yil 28-iyun kuni Toshkent davlat iqtisodiyot universiteti Samarqand filialida 2024/2025 o‘quv yilining 12-yakunlovchi Ilmiy kengashi bo‘lib o‘tdi. Mazkur kengash filial faoliyatini tahlil qilish, kelgusi yil uchun ustuvor yo‘nalishlarni belgilash, ta’lim va ilmiy ishlar sifatini yanada oshirishga qaratilgan muhim platformalardan biri hisoblanadi. Kengash ishini filial direktori, professor Olim Murtazayev boshqardi. An’anaga muvofiq, kengash avvalida yaqinda fan doktori, fan nomzodi darajasini va dotsent ilmiy unvonini olgan professor-o‘qituvchilar tantanali ravishda tabriklandi hamda ularga tegishli attestat va diplomlar tantanali topshirildi. Bu esa filialda ilmiy salohiyatning yil sayin oshib borayotganini yana bir bor tasdiqlaydi. Kengash kun tartibida filialda faoliyat yurituvchi barcha yo‘nalishlar: ta’lim, ilmiy ishlar,tarbiya, xalqaro hamkorlik, moliya-xo‘jalik ishlari va boshqa muhim yo‘nalishlar bo‘yicha 30 ga yaqin rahbar xodimlarning hisobotlari tinglandi. Har bir hisobotda o‘tgan o‘quv yilda erishilgan yutuqlar, muammolar va kelgusi rejalar keng muhokama qilindi. Kengashda, shuningdek, o‘quv ishlari bo‘yicha direktor o‘rinbosari, professor F. Axrorov tomonidan Davlat attestatsiya komissiyalari faoliyati, bitiruv malakaviy ishlarining himoyasi, talabalar ishtiroki va natijalari yuzasidan axborot berildi. Ta’lim sifati bo‘yicha tahlillar, professor-o‘qituvchilar faoliyatidagi ijobiy va takomillashtirishga muhtoj jihatlar Ta’lim sifatini nazorat qilish bo‘limi boshlig‘i, dotsent I. G‘aniev tomonidan taqdim etildi. Kengash yakunida filialda tayyorlangan o‘quv adabiyotlari, darsliklar va monografiyalar muhokama qilindi hamda chop etish uchun tavsiya etildi. Yosh tadqiqotchilar va doktorantlarning ilmiy mavzulari hamda rahbarlari rasmiy tasdiqlandi. Shuningdek, kengash kotibi Z. Mallaev tomonidan o‘tgan o‘quv yili davomidagi kengash faoliyati to‘g‘risida axborot berildi va mazkur faoliyat qoniqarli, deb baholandi. TDIU Samarqand filialida o‘tkazilgan ushbu kengash — yuqori malakali mutaxassislar tayyorlash, ilmiy salohiyatni oshirish va ta’lim sifatini yanada yuksaltirish yo‘lidagi navbatdagi muhim qadam bo‘ldi.