Joriy yilning 19-yanvar kuni Toshkent davlat iqtisodiyot universiteti Samarqand filialida “Kelajakka qadam” loyihasi doirasida seminar-trening bo‘lib o‘tdi. Mazkur tadbir O‘zbekiston Respublikasi Prezidentining 2025-yil 14-fevraldagi PQ–60, PQ–61 va PQ–62-son qarorlarida belgilangan vazifalar ijrosini ta’minlash, xususan bitiruvchi yoshlar bandligini qo‘llab-quvvatlash hamda ularning mehnat bozoriga muvaffaqiyatli integratsiyasiga ko‘maklashish maqsadida tashkil etildi.

Ushbu tashabbus doirasida Toshkent davlat iqtisodiyot universiteti Samarqand filialida “O‘zmilliybank” AJ bilan hamkorlikda “Kelajakka qadam” markazi tashkil etildi. Markaz faoliyati talabalarning tadbirkorlik salohiyatini rivojlantirish, ularni o‘z biznes g‘oyalarini amalga oshirishga yo‘naltirish va bitiruvchilarning bandligini ta’minlashga qaratilgan.

Markaz tomonidan tadbirkorlikka qiziqishi bor talabalarga imtiyozli kreditlar ajratish, biznes loyihalarni ishlab chiqish va moliyalashtirishda maslahat va amaliy yordam ko‘rsatish, bitiruvchilarni sohaga oid ochiq tanlovlarda ishtirok etishga jalb etish hamda ishga joylashtirishga ko‘maklashish rejalashtirilgan. Shuningdek, ish beruvchi tashkilotlarning malakali kadrlarga bo‘lgan ehtiyojini aniqlash asosida maxsus dasturlar ishlab chiqish hamda talabalarni xalqaro tajriba almashinuvi va qisqa muddatli o‘quv kurslariga yo‘naltirish markaz faoliyatining muhim yo‘nalishlaridan hisoblanadi.