TDIU Samarqand filiali bitiruvchilarining mehnat bozoriga integratsiyasini ta’minlash va ularni ish bilan ta’minlash maqsadida “Karyera kuni” mehnat yarmarkasi tashkil etildi.

Ushbu tadbirning asosiy maqsadi bitiruvchilar bilan ish beruvchi tashkilotlar o‘rtasida bevosita aloqa o‘rnatish, korxonalardagi yangi talablar bilan tanishtirish hamda talabalarga amaliyot o‘tash va ishga joylashishlari uchun qulay sharoitlar yaratishdan iborat.
Tadbir doirasida “Karyera kuni” va mehnat yarmarkalari tashkil etilib, bitiruvchilar korxona va tashkilotlar vakillari bilan muloqotda bo‘lishdi. Yarmarkada 60 ga yaqin tashkilotlar, jumladan oliy ta’lim muassasalari, viloyat hokimligi, tegishli boshqarmalar, tijorat banklari, davlat va xususiy sektor vakillari, IT kompaniyalar rahbar va mutaxassislari bo‘sh ish o‘rinlari bilan qatnashdi.

Xususan, Samarqand shahar hokimligi, Viloyat soliq boshqarmasi, Viloyat statistika boshqarmasi, Viloyat qishloq xo‘jaligi boshqarmasi, “Uztelekom” AK Samarqand filiali, “SAM ANTEP GILAM” qo‘shma korxonasi, “Drinks Spirits Distribution” MChJ, “FINALLIANCE” MChJ, “InfinBank” ATB, “TRASTBANK”, ATB “Ipotekabank”, ATB “Hamkorbank”, ATB “Aloqabank”, “Samarkand Stroy Servis” MChJ, “FAMALL” MChJ va “Toza Suv ASI” MChJ kabi korxonalardagi vakant ish o‘rinlari bo‘yicha so‘rovnomalarda bitiruvchi talabalar faol ishtirok etdi.

Yarmarka davomida bitiruvchilar o‘zlariga mos ish o‘rinlari bilan tanishish, ish beruvchilarga o‘z rezyume va ma’lumotlarini topshirish, suhbatlardan o‘tish imkoniyatiga ega bo‘lishdi. Ko‘plab talabalar joyida ishga qabul qilish bo‘yicha dastlabki kelishuvlarga erishdilar. Bu esa tadbirning samaradorligini yana bir bor namoyon etdi. Tashkilotlar vakillari tomonidan talabalar bilim saviyasi, kasbiy tayyorgarligi va tashabbuskorligi yuqori baholandi. Shu bilan birga, ayrim korxonalar o‘z ehtiyojlariga mos keluvchi mutaxassislarni tanlab olib, ularga amaliyot o‘tash va keyinchalik doimiy ishga qabul qilish takliflarini bildirishdi.

Tadbir yakunida so‘zga chiqqan mutasaddilar bu kabi tashabbuslarning nafaqat bitiruvchilar uchun, balki ish beruvchilar uchun ham manfaatli ekanligini ta’kidlab, “Karyera kuni” yarmarkasini muntazam ravishda o‘tkazib borish zarurligini qayd etishdi.

TDIU Samarqand filiali rahbariyati kelgusida bu kabi tadbirlarning ko‘lamini kengaytirish, xorijiy kompaniyalarni ham jalb qilish, shuningdek, turli yo‘nalishlardagi seminar-treninglar orqali bitiruvchilarning bandligini ta’minlashga qaratilgan sa’y-harakatlarni davom ettirishni rejalashtirmoqda.