TDIU Samarqand filialida 2025-yil 5-dekabr kuni “Ekofaol talabalar” bo‘limi hamda “Ekovolontyor talabalar harakati” tashabbusi bilan “Eko-etika va ekologik madaniyat” mavzusiga bag‘ishlangan seminar-trening o‘tkazildi. Tadbirning asosiy maqsadi talabalar orasida ekologik madaniyatni oshirish, eko-etika tamoyillarini targ‘ib qilish hamda yoshlarning ekologik muammolarni hal etishda faol ishtirokini kuchaytirishdan iborat bo‘ldi.

Seminarda “Ekovolontyor talabalar harakati” a’zosi, Yoshlar ittifoqining Iqtisodiyot fakulteti koordinatori, BB-124 guruh talabasi Jamoliddinova Niginabonu hamda “Ekologiya va yashil iqtisodiyot” talabalar ilmiy fan klubi rahbari, dotsent Z.S. Bobomuradov ma’ruzalar bilan ishtirok etdilar. Ma’ruzachilar ekologik ongni rivojlantirish, yashil iqtisodiyot tamoyillari, atrof-muhitni muhofaza qilishning dolzarb masalalari va talabalar tashabbuslarining ahamiyati haqida batafsil tushunchalar berdilar.

Seminar jarayonida ekologik madaniyatning ijtimoiy hayotdagi o‘rni, atrof-muhitga nisbatan mas’uliyatli munosabatni shakllantirish, ekologik loyihalar va volontyorlik faoliyatining yo‘nalishlari bo‘yicha amaliy tavsiyalar berildi. Talabalar ekologik tashabbuslarni amalga oshirish mexanizmlari, ekologik loyihalarni rejalashtirish va muammolarni hal qilishda zamonaviy yondashuvlar bilan tanishtirildi.

Ushbu seminar-trening O‘zbekiston Respublikasi Prezidentining 2025-yil 15-maydagi PQ–184-son qarori bilan tasdiqlangan “2030-yilgacha ekologik madaniyatni yuksaltirish konsepsiyasi”da belgilangan vazifalarni amalga oshirishga xizmat qiladi. Filialda ekologik madaniyatni oshirishga qaratilgan tadbirlar bundan buyon ham izchil davom ettiriladi.