Xalq tilida soddagina qilib “poraxo‘rlik”, keng ma’noda “korrupsiya” deb ataluvchi illat, mamlakat taraqqiyoti, jamiyatning barqaror rivoji yo‘lida jiddiy to‘siq sanaladi. Bu illat har qanday davlatning iqtisodiy, ijtimoiy va siyosiy hayotida jiddiy zararlar keltirib, keng ko‘lamli islohotlarning samarasini susaytiradi, jamoatchilik orasida qonunlarga, davlatga bo‘lgan ishonch muhitining buzilishiga olib keladi.

Shu sababli korrupsiyaning sabablari, unga qarshi kurash choralarini teran anglash va unga nisbatan murosasiz munosabatni shakllantirish, ayniqsa, yosh avlod orasida juda muhim vazifa sanaladi.

Ushbu dolzarb masala yuzasidan Joriy yilning 22-aprel kuni TDIU Samarqand filialida O‘zbekiston “Adolat” sotsial-demokratik partiyasi Markaziy apparati tashabbusi bilan “Bo‘lajak kadrlarni "halollik vaksinasi" bilan emlash – davr talabi” mavzusida keng qamrovli davra suhbati tashkil etildi.

Tadbirni filial Yoshlar masalalari va ma’naviy-ma’rifiy ishlar bo‘yicha birinchi prorektori Turdibekov Xasan Ibragimovich ochib berdilar. Tadbir davomida filial Korrupsiyaga qarshi kurashish “Komplayens-nazorat” tizimini boshqarish bo‘limi boshlig‘i Axmedov Alam Askarovich hamda soha mutaxasisslari ishtirok etishdi.

Tadbir davomida mutaxassislar mamlakatimizda olib borilayotgan keng ko‘lamli islohotlarga katta to‘siq va tahdid bo‘lmish korrupsiya  illati jamiyatni ich-ichidan yemiradigan og‘ir kasallik ekani, korrupsiyaning jamiyatimizga yetkazayotgan zarari hamda uning mamlakat rivojidagi salbiy oqibatlari haqida tushuntirishlar berilib, korrupsiyaga qarshi kurashishda nafaqat tegishli soha vakillari, aholining barcha qatlami birdek mas’ul ekanligi ta’kidlandi.