Mazkur yozgi maktab Regional Science Association International (RSAI) va Ipak yo‘li turizm va madaniy meros xalqaro universiteti  bilan hamkorlikda o‘tkazildi. Yozgi maktabning asosiy mavzusi akademik yozuv va ilmiy tadqiqot ko‘nikmalarini rivojlantirishga qaratilgan bo‘lib, unga iqtisodiyot, ijtimoiy fanlar, barqaror qishloq xo‘jaligi, turizm, tadbirkorlik va fazoviy iqtisodiyot sohalarida izlanish olib borayotgan yosh tadqiqotchilar va PhD izlanuvchilar jalb qilindi.

Dastur besh kun davomida xalqaro va mahalliy olimlar ishtirokida interaktiv ma’ruzalar, amaliy seminarlar va muhokamalar shaklida olib borildi. Dasturda O‘zbekiston, AQSh, Hindiston, Portugaliya va boshqa mamlakatlardan taniqli professorlar o‘z ma’ruzalari bilan qatnashib, ishtirokchilarga barqaror rivojlanish, mintaqaviy iqtisodiyot, turizm strategiyalari, xalqaro ilmiy nashrlar uchun maqola yozish, tadqiqot metodologiyasi kabi dolzarb mavzular bo‘yicha chuqur bilim va tajriba ulashdilar. Jumladan, Prof. Tomas Dentinho (Portugaliya)  generalizatsiyalangan Q tahlili va mintaqaviy fanlar bo‘yicha qiziqarli sessiyalarni olib bordi. Dr. Farhod Ahrorov (O‘zbekiston) tomonidan barqaror qishloq xo‘jaligi iqtisodiyoti mavzusida ma’ruza taqdim etildi. Shuningdek, Prof. Abdul Shaban (Hindiston) tadqiqot metodologiyasi bo‘yicha nazariy va amaliy bilimlar bilan bo‘lishdi.

Yozgi maktab doirasida ishtirokchilarga Samarqandning tarixiy obidalariga sayohat ham tashkil etildi. Dastur yakunida barcha ishtirokchilarga rasmiy sertifikatlar topshirildi.  

Ushbu yozgi maktab akademik salohiyatni oshirish, xalqaro ilmiy aloqalarni kengaytirish, hamda yosh tadqiqotchilarni ilmiy faoliyatga rag‘batlantirish borasida muhim qadamlardan biri bo‘ldi. Dastur davomida shakllangan do‘stona muhit, mazmunli taqdimotlar va faol ishtirokchilar orqali yozgi maktab o‘z oldiga qo‘ygan maqsadlariga to‘liq erishdi.