AHOLI VA QISHLOQ XO‘JALIGINI RO‘YXATGA OLISH — DAVLAT BOSHQARUVI VA BARQAROR RIVOJLANISHNING STRATEGIK ASOSI

Bugungi globallashuv sharoitida har bir davlatning barqaror rivojlanishi ishonchli, aniq va tizimli statistik ma’lumotlarga tayanadi. O‘zbekiston Respublikasida amalga oshirilayotgan keng ko‘lamli ijtimoiy-iqtisodiy islohotlar ham ilmiy asoslangan tahlil va real ko‘rsatkichlarga suyangan holda olib borilmoqda. Aholi soni, demografik tarkib, bandlik, yashash sharoitlari hamda qishloq xo‘jaligi resurslari haqidagi to‘liq ma’lumotlar samarali davlat boshqaruvi va strategik rejalashtirishning muhim omili hisoblanadi.

Shu ma’noda, 2026-yil 15-yanvardan boshlab mamlakatimizda aholi va qishloq xo‘jaligini ro‘yxatga olish jarayonining boshlanishi muhim ijtimoiy-siyosiy ahamiyatga ega. Mazkur jarayon orqali aholi tarkibi, mehnat bozori holati, ta’lim va sog‘liqni saqlash tizimlari, uy-joy sharoitlari, qishloq xo‘jaligi yer resurslari va ishlab chiqarish salohiyati bo‘yicha kompleks statistik ma’lumotlar shakllantiriladi.

Ro‘yxatga olish natijalari hududlarni ijtimoiy-iqtisodiy rivojlantirish dasturlarini ishlab chiqish, kambag‘allikni qisqartirish, bandlikni ta’minlash, infratuzilma loyihalarini rejalashtirish va byudjet mablag‘larini adolatli taqsimlashda muhim asos bo‘lib xizmat qiladi. Hududiy kesimdagi aniq ma’lumotlar davlat siyosatining manzilliligini oshiradi.

Aholini ro‘yxatga olish jarayoni ochiqlik, ixtiyoriylik va shaxsiy ma’lumotlarning maxfiyligi tamoyillari asosida olib boriladi. Fuqarolar census.stat.uz portali orqali OneID tizimi yordamida o‘zlari va oilasi haqidagi ma’lumotlarni mustaqil ravishda taqdim etishlari mumkin. Ushbu ma’lumotlar faqat statistik va tahliliy maqsadlarda foydalaniladi.

Toshkent davlat iqtisodiyot universiteti Samarqand filiali jamoasi va talaba-yoshlari mazkur muhim davlat tadbirida faol ishtirok etib, aholiga tushuntirish va targ‘ibot ishlarini olib bormoqda. Aholi va qishloq xo‘jaligini ro‘yxatga olish — bu mamlakatimizning barqaror rivoji va farovon kelajagi uchun muhim strategik jarayondir.

Olim Murtazayev,
TDIU Samarqand filiali direktori, professor