Qozog‘iston Respublikasi Fan va oliy ta’lim vazirligi 2022-yil 22-dekabrdagi “O‘zbekiston Respublikasi Hukumati va Qozog‘iston Respublikasi Hukumati o‘rtasida oliy va oliy ta’limdan keyingi ta’lim sohasida hamkorlik to‘g‘risida”gi Bitimning 8-moddasiga muvofiq, 2025/2026 o‘quv yili uchun Qozog‘iston Respublikasining oliy ta’lim muassasalarida tahsil olish maqsadida O‘zbekiston fuqarolari uchun 20 ta grant o‘rinlarini ajratmoqda. Xususan:

• 14 ta o‘rin — bakalavriat yo‘nalishlari bo‘yicha;
• 6 ta o‘rin — magistratura mutaxassisliklari bo‘yicha ta’lim olish uchun mo‘ljallangan.

Grant — OTMda bepul ta’limni nazarda tutadi. Transport va yashash bilan bog‘liq xarajatlar talabaning o‘zi tomonidan qoplanadi.

Ushbu grantlar asosida ta’lim beruvchi Qozog‘istonning 73 ta OTM ro‘yxati ilova qilinadi. Nomzodlar bakalavriat yo‘nalishlari va magistratura mutaxassisliklari bilan tanishish uchun tanlagan OTMning rasmiy veb-saytiga murojaat qilishlari yoki mazkur OTMning qabul komissiyasiga murojaat etishlari mumkin.

Nomzodlardan quyidagi hujjatlar paketi talab etiladi:

1. Qozog‘iston oliy ta’lim muassasalarida o‘qish uchun ariza (shakli ilova qilinadi);
2. Shaxsni tasdiqlovchi hujjat nusxasi (xorijiy pasport);
3. Oldingi ta’lim darajasi to‘g‘risidagi hujjatning notarial tasdiqlangan nusxasi (agar mavjud bo‘lsa, baholar ilovasi bilan);
4. Nomzod yashab turgan mamlakatning sog‘liqni saqlash rasmiy organi tomonidan berilgan, chet elda o‘qish uchun tibbiy ma’lumotnoma;
5. OITS (VICh) va SPID yo‘qligi haqida tibbiy ma’lumotnoma (rasmiy tibbiy organ tomonidan berilgan);
6. Motivatsion insho — qozoq, rus yoki ingliz tilida;
7. Tavsiyanoma — qozoq, rus yoki ingliz tilida;
8. Sudlanmaganlik to‘g‘risida ma’lumotnoma.

Talablar:

Ushbu grantlar O‘zbekiston Respublikasi fuqarolari — O‘zbekiston davlat oliy ta’lim muassasalari talabalari yoki akademik litsey o‘quvchilari uchun ajratiladi.

• Bakalavriat dasturlariga topshiruvchilar o‘rta ta’lim hujjatidagi umumiy o‘zlashtirish ko‘rsatkichi “B” darajasidan past bo‘lmasligi lozim.
• Magistratura dasturlariga topshiruvchilar bakalavr yoki mutaxassis diplomi bo‘yicha o‘rtacha balli ko‘rsatkichi 4.0 dan kamida 3.3 GPA bo‘lishi lozim (yoki unga ekvivalent baho).

Muddatlar:

Nomzodlar o‘z hujjatlar to‘plamining elektron nusxasini tahsil olayotgan oliy ta’lim muassasasiga (litsey o‘quvchilari — o‘ziga biriktirilgan OTMga) topshiradilar. OTMda bu jarayon uchun mas’ul — xalqaro hamkorlik bo‘limi hisoblanadi.

Oliy ta’lim muassasasi nomzod hujjatlarini yuqoridagi talablarga muvofiq yig‘ib, O‘zbekiston Respublikasi Oliy ta’lim, fan va innovatsiyalar vazirligiga rasmiy xat bilan quyidagi manzillardan biriga yuboradi:
📧 xab@edu.uz yoki edu_xalqaro@exat.uz.

Hujjatlar yuborish muddati — 2025-yil 20-iyungacha.

Shuni ta’kidlash kerakki, nomzodlar tomonidan tanlangan mutaxassisliklar rasmiy topshirilganidan keyin o‘zgartirilmaydi.

Shuningdek, hujjatlarning qog‘oz (original) nusxalari talabalar tomonidan Qozog‘iston OTMlariga yetib borgach, ular bilan birga olib kelinishi talab etiladi.